ترجع اصوله الى مدينه شندي .. المتمه
من سكان بحري حي الانقاذ .. طالب ماجستير بجامعة في لندن يدرس هندسة مدنية .. اتى من بريطانيا
إلى الخرطوم لحضور عقد قران اخته
.. قتل في فض اعتصام القيادة العامة
سبب مقتله الرئيسي هو انه كان ناشط سياسيا وقد استهدف اثناء فض الاعتصاام والاقوال الشائعة بأنه كان يدافع عن فتاة خاطئة
كان على مدار السنين و كل رمضان يكون واقفا في شارع الانقاذ امام بيتهم و بعمل على توزيع اكياس للماره عشان يفطرو ..
حتى رمضان الماضي ٳلى ان استشهد
انتشر هاشتاق Blue for sudan بعد وفاته على نطاق عالمي واسع
نسبه لحبه لـ اللون الازرق وتعلقه الشديد به و تفاعلت معه شخصيات عالميه .. و تم تغيير شارع بـ اسمه ( شارع الشهيد محمد هاشم مطر ) شارع الانقاذ سابقا ..
وحكي عن رواد مواقع التواصل ان امه كتبت منشور تعبر فيه عن حزنها الشديد عليه
لنتابع ماذا قالت..
لاقاني بوست لواحدة مُشيرة صورة الشهيد محمد هاشم مطر بكابشن جمييييل جداً ومؤثر..
وفى نهايته عبرت عن شوقها الشديد ليه "ربنا يرحمه ويغفر ليه "..
طلعت أمه لما دخلت بروفايلها..
الwall بتاعها كله عبارة عن صور ولدها وبوستات كاتبينها فيما يبدو أنهم معارفه -وما معارفه - كلها بتتفق فى إنها بتعدد مآثر وجمال الشهيد مطر..
مدى الفخر اللي أمه حاسة بيهو تجاه فقيدها بتكاد تلمسه،
لكن انا متأكدة أنه الحزن الجواها عمره ما ح يقل بفراقه الأبدي..
فااا المهم..
"طلعت من حسابها ودعواتي بترافقها أنه ربنا يربط على قلبها ويجبر كسرها"..
بعدها عملت سيرش لكم شهيد كده، وشفت آمالهم وطموحاتهم الكانو مليانين بيها..
تراجيديا السفر والاغتراب الكان هاجس مُلح علينا كلنا لضيق العيش فى بلد حرمتنا أبسط حقوقنا
وهنا طبعاً لازم أربط الموضوع ده بكم بيت من رائعة علاء أبو سير "عافية منك "لما قال :
"إنت ساعة تبقى جمبي بتبقي ضلي وتوب دفايا ،وما بخاف ظلم الليالي إنت ما عكاز عمايا ..
دايرة أقضي عميري جمبك أصلو قارب للنهاية ،خايفة كان سافرتا ترجع تلقى فاضي البيت بلايا.. إلخ "..
الله يلعن الغُربة ياخ..
بس الأمرّ منها غربة الإنسان فى بلده ..
الغُربة الأتبددت بالنسبة لينا من يوم 6 أبريل المجيد..
أتذكرت منظري وأنا واقفة فى كبري كوبر الساعة 1:17pm فى رأس عربية تسنيم وبكورك "بطل عربيتك فى الكُبري"..
ومعاي جمع غفير جداً من بُري بشيبها وشبابها وأطفالها..
وقد كان ❤
كنت واقفة بعاين للعربات واقفة على امتداد البصر من غير سواقينها ..
لحظتها أتذكرت أمين مكي-وهو في المعتقل- وإتحسرت على أنه ما ف عشان يشوف أحلامه بقت واقع والناس سمعت كلامه..
أتذكرت التلاتة أولاد البدو الهُتاف الساعة 1 طق طرق وجموع الناس الطلعت فجأة من كل حدب وصوب ..
وصوتنا كلنا مُوحد بأن
"حرية سلام وعدالة ..والثورة خيار الشعب "..
كنت مخلوعة جداً من العدد المهول والضخم الحواليني ده،
أتذكرت منظر الكجر وهم جاريين لما بقينا كُتار شدييييد ، الشرّك بتاع دار الشرطة ،البمبان الحار جداً داك ، فقدت القدرة على التنفس حرفياً وأنا أساساً زولة asthmatic..
آمنة وهي بتتجاري عشان تجيب لي الخل والخميرة والنيم وأولاد بري الحاوطونا من الكجر..
وأول لحظات دخول أرض القيادة العامة..
المواكب وتوافدها لأرض القيادة العامة، عمو الكان ببكي وبكبّر ومبسوط وفخور بينا جداً جداً..
الناس الكانت بتتقالد وتبكي فرحاً رغم أنهم ما بيعرفو بعض نهائي..
عساكر الجيش الحمونا في صينية بُري ، العسكري الواقف فى سور القيادة بجوة وقاعد ببكي زي الطفل فى الأرض..
العساكر الجابو البراميل خلال لحظات عشان يشربو الناس الكتيرة شديد دي ونظرة الاندهاش ما فارقتهم..
ومن ثم الشفّت الكان شايل مرتبته ومخدته وحايم وسط الناس..
وبعدها
"إعلان الاعتصام أمام قيادة القوات المسلحة "..
شهرين ..
عيادة الكهرباء بكل تفاصيلها ومن ثم التدريب المهني ..
شباب المركزية الما في منهم والبشكر ربنا يومياً عليهم ❤
"أرفع يدك فوووق التفتيش بالذوق "..
"الموية ما للرش ،الموية نشربها بس "..
"الحكومة الراكبة تاتشرات.. "
"وداد أم جضوم والولد البرقص داك "
#April11
"بيان مهم لقوات الشعب المسلحة بعد قليل فترقبوه "
الشارع كله متجه لي الميدان ، حدث تاريخي لازم نحضره هناك..
انتظار
انتظار
"سقطت " ؟!
لأ.. #لم_تسقط_بعد !
"إبن عوف ماله ،إبن عوف وسخان والجابه منو ؟!
جابوه الكيزان ! "
مواصلة حالة الطوارئ التى أعلنها المخلوع البشير ..
وفرض حظر التجوال
#april13
"نحن الجيل البملأ العين وفى يومين سقطنا إتنين"..
في اللحظة دي بالذات لاحت ذكرى البطل "عباس فرح"..
عقلي حصل ليه بلاك أوت ما عارفة ليه ؟
عباس ده ح نحكي بيهو لأولادنا بعدين..
ونوريهم أنه عباس ده هو الكمّل الرجالة..
أنه ما ف زول فات عباس ده فى بسالته نهائي ، عباس الوصل الترس وهو بنزف وما كان هاميهو
إنسان لطيف جداً ومحترم رغماً عن أنه اتعاملتا معاه مرتين بس وف آخر أيام الاعتصام ..
منظر عباس وهو ماشي على الترس من يوم الفض المشؤوم لازم أفكر فيها قبل ما أنوم..
لاااازم ..
والبلاي باك بتاع المنظر ده شغال فيه
"بس بلغي العسكر أنه الترس باقي "..
ده طبعاً غير انه محل ما أمشي سيرة عباس بتجي كتير ولازم زول يقرر يتكلم عنه قدامي !
بقول لصحبتي "لعنة عباس فرح ملازماني للأبد "..
حتى لما جابوه رويال كير كنت أول زول شافه في باب الer عشان كنا بنصنف الإصابات..
ليه عباس بالذات ؟
ما عارفة..
لكن العارفاهو أنه عباس والفاتح وعبد العظيم ومطر كانوا عارفين روحهم بعملو ف شنو ، زينا كلنا وعارفين أنه العسكر ما عندهم دين ولا ملة..
واختاروا يضحو بدمهم عشان البلد دي ،عشان هي غالية وبتستحق..
وعشانا نحناااااا ..
عقدة الذنب من يوم وفاتهم ما أظن أقدر اتخلص منها..
وكنت خايفة تنسوهم وابتسامتهم تروح من بالكم
لكن لأ ..
كل يوم بمر بثبت لي أنه الشباب ديل محفورين جوانا شديد بتفاصيلهم الكتيرة جداً..
وما ح ننساهم مهما حصل وح نجيب تارهم..
كل سنة وأنتو طيبين يا كِرام ❤
كل سنة وأنتو الورد الفتّح في جناين البلد دي..
كل سنة وأنتو أرهب ناس وأعظمهم على الإطلاق
وأكيد عيدكم فى الجنة أسمح جداً ✌💐
"حليلك مُهندم ..ومارق كأنك براك الملاك" ❤
ياخ والله فاقدينكم جداً..
#منقول ..
المجد للشهداء المجد لهم .. 💜
وتردد صوته عبر فيديو يعبر فيه عن الثورة ويقول:
حرام علينا لو دم الشهيد راح
لذلك سيظل محمد احد رموز الثورة ولن تختفي صورته من هذا الجيل والاجيال القادمة.https://youtu.be/plPUI8r6nSI
.
.
.
لا تنسى الاشتراك بالبريد وكتابة رأيك في صندوق التعليقات لأن رأيك يهمنا 💛💛👇👇👇
.
.
.
لا تنسى الاشتراك بالبريد وكتابة رأيك في صندوق التعليقات لأن رأيك يهمنا 💛💛👇👇👇
تعليقات
إرسال تعليق